Uppskriftir

Íslensk kjötsúpa ( hefðbundin )

Innihald

1 kg súpukjöt
1,8 l vatn
1 msk salt eða eftir smekk
1-2 msk súpujurtir
½ laukur, smátt saxaður
500 g gulrófur
500 g kartöflur
250 g gulrætur
100 g hvítkál (má sleppa)
nýmalaður pipar

kjotsupa-live

Margir bæta öðru grænmeti í súpuna, s.s. sellerí, blaðlauk, grænkáli, næpum og njóla. Sumum finnst betra að sjóða gulrófurnar sér og jafnvel kálið líka. Oft er súpan gerð matarmeiri með því að sjóða hafragrjón eða hrísgrjón í henni.

Fituhreinsið kjötið (eins og hver vill) og setjið í stóran pott, hellið vatni yfir og hitið að suðu. Fleytið froðunni ofan af og saltið. Bætið súpujurtum og lauk útí. Sjóðið í u.þ.b. 40 mínútur. Afhýðið og brytjið gulrófur, gulrætur og kartöflur og bætið út í. Sjóðið í 15 mínútur til viðbótar. Skerið kálið í mjóar ræmur og setjið út í. Leyfið súpunni að sjóða í u.þ.b. 5 mínútur eða þar til grænmetið er meyrt. Bragðbætið með salti og pipar, ef þarf.

Lambakjötið er ýmist borið fram í súpunni eða með henni á sérstöku fati.

Fleiri kjötsúpuuppskriftir eru á www.lambakjot.is – prófið hvaða súpa yljar best á vetrarkvöldi í góðum hópi.

Njótið vel – og verði ykkur að góðu!